تحدث شريف إكرامي حارس مرمى بيراميدز، عن قرار لجنة التظلمات الخاص بأحداث مباراة القمة بين الأهلي والزمالك.
وقررت لجنة التظلمات التابعة لاتحاد الكرة المصري، في وقت سابق، تأييد قرار رابطة الأندية باعتبار الأهلي خاسرًا أمام الزمالك بنتيجة 3-0، مع عدم خصم 3 نقاط من رصيده، في ظل اعتراض القلعة البيضاء وأيضًا نادي بيراميدز.
وكتب شريف إكرامي عبر حسابه على منصة “إكس”: “قرار لا يحتاج خبيرًا ليكشف عواره، ولا اللائحة محتاجة متخصص علشان يوضح ثغراتها.. المشهد مكشوف والتجميل ما بقاش ينفع”.
وأضاف: “ارتعاش اللوائح وتفصيل القرارات أصبح جزءًا أصيلًا من ثقافة المنظومة وسببًا أساسيًا في تدهورها.. وعشان نقدر نبني منظومة تحترم نفسها وتتطور، ثبات القرار واستقلالية القواعد من أي عوامل خارجيه هو حجر الأساس”.
وأردف: “ووسط الارتباك ده، بيظهر نوع تاني من الخطر، بيظهر ناس بتقبل الظلم والتدليس لما يكون في مصلحتها وبتجتهد في اختراع مبررات عشان تمحي بيها شعورها بالذنب، وده للأسف بيكشف التناقض بين قيمهم وأفعالهم، بس التبرير عمره ما بيمحي الحقيقة بالعكس ساعات بيعرّيها أكتر خصوصًا لما نكون قدام حالة تدليس واعي ومتعمد، وده أخطر من الكذب، لأنه بيغلف الباطل بقناع المنطق ويوهمك إن الغلط صح”.
واستطرد: “وكالعادة، هيتحول الجدل من مناقشة قرار مشوّه لتبادل اتهامات، وتخوين، وتشويه كل صوت مختلف، وكأن المشكلة مش في القرار، لكن في اللي بينتقده.. وعمومًا الكورة زيها زي الدنيا، قيم الناس الحقيقية بتبان فيها وقت الاختبار”.
واختتم إكرامي في تغريدته، كاتبًا: “في النهاية كامل احترامي لكل من اختار ضميره قبل انتمائه لأن الحق ما بقاش بيتقال مش عشان الناس نسيته، بس عشان بقوا خايفين يدفعوا تمنه”.