كهربا: روح الفريق سيستم الأهلي.. وجمهوره عمره ما يغلط في حد

علق لاعب النادي الأهلي محمود عبدالمنعم «كهربا»، على الأزمة الأخيرة بين نجم الزمالك محمود عبدالرازق «شيكابالا» وجماهير الأحمر عقب انتهاء مباراة نهائي كأس مصر بالسعودية، والتي حسمها الأحمر بهدفين نظيفين، قائلًا: «مابحبش أتكلم عن لاعبين خارج النادي الأهلي طالما مش زميل ليا، وكان فيه مشكلات بين شيكابالا والجمهور».

وقال محمود كهربا، خلال استضافته ببرنامج «أسرار» مع الإعلامية أميرة بدر المذاع على قناة النهار: «الجمهور بيعرف يعصب اللاعب، وعارفين الدخلة بتاعته وإزاي يضايقوه، وجمهور الأهلي عمره ما يغلط في حد، وفي سابقات بين الجمهور وشيكابالا، معرفش مضى للأهلي ليه قبل كده، والنادي طموح لأي لاعب في مصر وإفريقيا، وحلم لأي حد يلبس التيشيرت بتاعه».

وتابع: «ماتشات الديربي لازم نكسبها، وإحنا في الأهلي بنبقى داخلين عشان نكسب الماتش، لكن موضوع إن لاعبي الزمالك بيتربى جواها كره الأهلي ده معرفوش، وإحنا في القلعة الحمراء عندنا سيستم أننا روح جماعة، مش روح النجم الأوحد».