شوبير يكشف عن أزمة في الأهلي: «تحتاج إلى تدخل سريع»

كشف الإعلامي أحمد شوبير عن أزمة واضحة في فريق الأهلي، خلال الفترة الأخيرة، وقال: «تعالوا نشوف مشاكل الأهلي، الفريق قدام حرس الحدود اتسجل فيه هدفين، نفس الكلام قدام مودرن سبورت، وكهرباء الإسماعيلية سجل فيه هدفين، يعني في 3 ماتشات ورا بعض شباك الأهلي اهتزت 6 مرات ده رقم كبير جدًا بالنسبة لفريق كان بيقفل الماتشات بالشهور من غير ما يدخل فيه هدف واحد».

شوبير يسلط الضوء على أزمات الأهلي

أضاف شوبير في تصريحات عبر برنامجه المذاع عبر «راديو أون سبوت إف إم»: «واضح إن فيه خلل في الدفاع، فيه أخطاء متكررة، ولازم المسؤولين في الأهلي يقفوا عند الموضوع ده، لأن الفريق مش متعود على كده، وده مش مستوى الأهلي المعروف».

وتابع: «كمان موضوع الشد العضلي بقى ملف كبير جدًا، الإصابات العضلية بقت كتير ومبالغ فيها، والناس قالت إن المشكلة إن في فترة ريبيرو ماكنش فيه حمل زايد، دلوقتي ريبيرو مشي، ومسك عماد النحاس، وقاد الفريق في 5 ماتشات، يعني وقت مش قليل، والمشكلة لسه موجودة، وده أمر غريب جدًا».

واختتم شوبير بالتأكيد على ضرورة تدخل مسؤولي الأهلي بسرعة، لأن استمرار المشكلات يمكن أن يؤثر على مشوار الفريق في البطولات، خاصة في ظل ضغط المباريات والمنافسة القوية.