05:12 م | الثلاثاء 18 نوفمبر 2025
محمد علاء
أعلن محمد علاء محلل أداء الفريق الأول لكرة القدم بنادي الزمالك ومترجم البلجيكي يانيك فيريرا المدير الفني السابق، رحيله رسميًا عن القلعة البيضاء.
محمد علاء محلل أداء الزمالك يعلن رحيله عن الفريق
كتب محمد علاء، عبر حسابه الرسمي على «فيسبوك»: «على مدار الرحلة بتشعر أن فيه لحظات صعبة، وأوقات من كتر ما هي شاقة تحس أنها مش هتمر، لكن صراحة مفيش شيء صعب ممكن أعيشه في الرحلة دي، أصعب من كتابة سطور الوداع، ونهاية رحلتي مع الزمالك».
وتابع: «وقت خروجي السابق، كنت عازم النية أني أستمر في التعلم أكتر وأكتر، لحد ما أثقل موهبتي بقدر كافي.. مكانش فيه تاريخ محدد للعودة ولا حد للتعلم، كنت مفروض أحس معاه أن ده وقت مناسب للرجوع.. لكن بعد شهور بسيطة كان عندي فرصة جديدة للرجوع للزمالك، وهو شيء مستحيل ما حييت أفكر حتى مجرد تفكير في رفضه، وكانت العودة».
وأضاف: «زي ما أكدنا وقت الرحيل، حتمي.. وبنفس الحتمية، كان لازم نكتب دلوقتي سطور الوداع، واللي مكتوب في طياتها كل كلمات الامتنان والشكر لكل شيء عيشته في تجربتي مع الزمالك، حتى أوقات الانتقاد والذم وعدم الرضا، لأنها كانت مع شدتها، بتفكرني في كل لحظة بقيمة ومكانة المكان اللي كنت موجود فيه، كان عندي طموح كبير أسيب الفريق ببطولة السوبر، وسعيت بكل ما أملك أنا وكل الموجودين، وهعيد كلام كابتن أحمد عبد الرؤوف، أننا مكناش بننام طول مدة المعسكر في الإمارات، لأننا فعلًا كان نفسنا نفرح الجمهور ونفرح معاه، لأننا كلنا زملكاوية قبل أي صفة تانية».
وواصل علاء: «طول طفولتي وشبابي كنت دايمًا مشهور بكوني زملكاوي، حتى لو شخص يعرفني بس شكلًا ومايعرفش اسمي، هيفتكرني بإني زملكاوي، وأنا بحسب نفسي محظوظ لأن أكبر خطوات مسيرتي المهنية خدت فيها وصف زملكاوي.. حتى لما خضت رحلة احتراف في الجزائر كنت بتعرف بالزمالك، ولما قررت أرجع مصر، كان الكل متأكد أن الزمالك هو وجهتي التالية لا محالة، أكتر شيء سبب لي أثر سلبي في الفترة الأخيرة، كان أن فيه ناس وصفتني بأني مش زملكاوي، وده آخر ما يمكن وصفي بيه».
وأكمل: «تقبلت كلام من ناس شافتني غير مؤهل، وتحملت على مضض تشويه في سمعتي ومهنيتي، برغم كل محاولاتي الحفاظ عليهما في كل دور قومت بيه في الفريق طول وقت وجودي في النادي، لأن طبيعي لما بتشتغل في بيتك مابتحسبهاش إذا كان ده أساس وظيفتك ولا محتاج تعمل حاجات زيادة لمصلحة الفريق».