أول تعليق من كولر على فوز الأهلي أمام إنبي: لست سعيدا بالنتيجة

عبَّر السويسري مارسيل كولر مدرب النادي الأهلي، عن عدم سعادته رغم الانتصار على حساب إنبي بهدفين دون رد، في إطار منافسات الدوري المصري الممتاز، مشيرًا إلى أن الفريق الأحمر ما زال يهدر العديد من الفرص، ومتطرقًا للحديث عن إمكانية ارتداء علي معلول لشارة القيادة.

كولر: كنا المفروض نكسب 5 مستريح.. وكل اللاعبين زي بعض لا يوجد هناك أساسي واحتياطي

وقال كولر في تصريحاته بالمؤتمر الصحفي عقب لقاء الأهلي وإنبي: «سعداء بالفوز لكن مش سعداء بالنتيجة كان ممكن تخلص أكثر من كده، سيطرنا على المباراة وبعد الهدف الثاني الأمور خلقنا فرص كتير، خصوصا الشوط الثاني المفروض نكسب 4 أو 5 مستريح».

ورد على دفعه باللاعبين الأساسيين أمام إنبي قائلاً: «يعني إيه لاعب أساسي كل اللاعبين زي بعض، في الوقت الحالي ريتم المباريات بيخلينا مندفعش باللاعيبة بشكل سريع ومعنديش أساسي واحتياطي وطول الوقت بحاول أجهز كل اللاعيبة ومفيش خطورة عليه من الإصابات».

وتابع: «معرفش هعمل إيه الماتش الجاي، المهم بالنسبة لي أشوف 100 % في التمرين من اللاعيبة وهو دا اللي له فرصة في المباريات معايا لو 60%مش هشوفه، ممكن أحاول أغير شوية علشان اريح بعض اللاعبين لكن عددهم كم دلوقتي مقدرش اقول حاليا، بنحاول ندير الأمور بشكل كويس علشان ميبقاش في خطورة على اللاعيبة».

مدرب الأهلي عن عدم ارتداء معلول لشارة الكابتن: لو الجمهور عايز يمشي الفريق يبقى أنا أقعد في البيت

وأكمل: «في قواعد صارمة في الأهلي بخصوص شارة الكابتن وعارف الجمهور بيتكلم في القصة دي لكن هذا لا يعنيني، مش هيحصل إني أغير بشكل غير فني علشان حد يلبس الشارة، مش هجامل حد، ممكن ده يحصل بس لو بشكل طبيعي زي أن حد يتصاب مثلا أو يغيب بشكل قدري، لو الجمهور عايز يمشي الفريق يبقى أنا أقعد في البيت، في قواعد ومش هسمح بكده».

وأتم: «المفروض أهدافنا تبقى أكثر مقارنة بالفرص اللي بنخلقها، وهذا سببه غياب التركيز في القرارات، بجانب تدريب ضربات الرأس، وفي جهاز طلبناه من ألمانيا لتطوير اللاعبين».