واعظة بالأوقاف: هذه الأمور تجعل الزوج يلبي طلباتك بدون جدال

11:44 ص


الخميس 03 أكتوبر 2024

كتب-محمد قادوس:

أكدت الواعظة بوزارة الأوقاف، فاطمة عنتر، أن الزوجة يمكن أن تجعل بيتها سعيدا بطريقة طلبها وتعاملها مع زوجها.

وأضافت عنتر، في لقاء لها على قناة “الناس”: ” أول حاجة، وأنتِ بتطلبي الطلب، اختاري الوقت المناسب، الوقت المناسب ليه وللزوج يعني مثلاً هو جاي من الشغل وعلى فكرة، بين قوسين، أنا عايزة أهمس في ودنك وأقول لكِ: لو حضرتك امرأة، مش عاملة، لازم تكوني عارفة إن بره الحياة العملية قد إيه صعبة ـ ممكن جدًا جدًا يكون هو بيتعرض لإيذاء كبير في شغله، من مديره أو من زملائه، فينفّسوا عليه أو حد يتصيد له أخطاء، فهو بيكون جاي طبعًا لبيته في حالة صعبة.

وأوضحت الواعظة، أن صعب جدًا إنه يحكي لك التفاصيل دي لأنها بالنسبة له مصدر إهانة أو شيء يحس فيه إنه قليل قدام نفسه، فمش هيقول لك عليها، لكن إذا كنتِ عارفة ده، لازم تراعي جدًا، وهو جاي من الشغل محتاج ابتسامة كويسة ومقابلة لطيفة، وطبعًا الأكل بتاعه جاهز وكل حاجاتنا جاهزة في البيت”.

وبينت: ولو حضرتك امرأة عاملة، هتبقى عارفة ده كويس قوي، هتبقي محتاجة بالنسبالك إن البيت يشعر فيه بالسكينة، فهو جاي البيت، لسه داخل، حاولي تأجلي الطلبات شويه لحد ما يبدأ يهدأ ويرتاح وياخد مود إنه قاعد في البيت معاكي”.

وكانت الشركة المتحدة للخدمات الإعلامية، قد أطلقت قناة الناس في شكلها الجديد، باستعراض مجموعة برامجها وخريطة الجديدة التي تبث على شاشتها خلال 2023.

وتبث قناة الناس عبر تردد 12054رأسي، عدة برامج للمرأة والطفل وبرامج دينية وشبابية وثقافية وتغطي كل مجالات الحياة.