02:01 م
الخميس 12 سبتمبر 2024
كتبت- نوران أسامة:
تراجع الفنان علي الطيب، عن الهجوم الذي شنه على صناع مسلسل “عمر أفندي”، بسبب استغلالهم لجملة شهيرة له “دي حاجة 13 خالص”، الذي سبق استخدامه في مسلسل “أهو دا اللي صار”.
وكتب الطيب، عبر حسابه الخاص بموقع “فيسبوك”: “تم حذف البوست والأسباب هي، أنا ممكن أكون عبرت بشكل يزعل زمايلي من اللي اتكتب بس هما زعلوني بأنهم مذكروش في أي برنامج أو أي لقاء أنهم اقتبسوها من “وديع البساطي” في مسلسل “أهو ده اللي صار”، مصطلح موجود في مصر زمان فعلًا مش أنا اللي اخترعتها، بس بيبقى كل ممثل بيبذل مجهود من أجل الشخصية تبقى لحم ودم مش كلام على ورق فقط وبيقول كلامه وخلاص”.
وتابع: “وده كان جزء من مجهودي اللي تم أثناء تحضير الشخصية في المسلسل وبعد ما عرضت بعض المصطلحات على الأستاذ السيناريست عبدالرحيم كمال والأستاذ حاتم علي عليه رحمة الله، اخترنا اللي يتناسب مع الشخصية التي تعبر عن شخصيته واتوظف في الحوار بشكل مناسب ومنطقي للمشاهد من الأستاذ عبدالرحيم، واتعرض المسلسل”.
وأضاف: “وربنا كتب لنا القبول في قلوبكم، ونجح المسلسل واشتهرت شخصية وديع البساطي بمصطلحاتها اللي تعتبر كانت جديدة على الجمهور رغم أن الجملة لها أصل ومعنى ووضحناه في المسلسل، وأظن احنا في مهنة واحدة يعني عارفين شغل بعض ونعرف بعض كويس وبينا كل خير، لا يمكن يجيلي عمل فني أو اسكريبت واكتشف أن في جملة أو مصطلح مشهور لزميل ليه ونجح بيه وأكرره أو أتجاهل مجهوده هو وصناع العمل واحترم نجاحه”.
وقال: “حق كل فنان يغير ويبقى نفسه يعمل شخصية حلوة ويستمتع بأدائها المشاهد، وده حق شرعي بس أظن أن التميز هنا هيكون في الاختلاف والاجتهاد المطلوب منك وليس الاستسهال، ولنفرض حصل وقولت مصطلح يخص شخصية فنية لعبها زميل ومتفرجتش عليه أو مفيش حد نبهني، يبقى أقل واجب بعد عرض المسلسل وعرفت المعلومة يبقى أقل حق سواء كتاب العمل أو أنا كفنان أوضح في أي لقاء في أي برنامج أنه تم الاقتباس من العمل الفني اللي قبلنا، ووقتها مش هيكون ليا حق ازعل وافهمها تجاهل من زمايلي لأني غصب عني مفهمتهاش غير كده”.
واستكمل حديثه قائلًا: “اللي يعرفني كويس عارف إني دايما مبتأخرش عن زمايلي وبفرح لنجاحهم من قلبي ولا عمري نفسنت ولا اتكلمت في تفاصيل شبه دي، بس الموضوع لو مكنش يخصني كنت هقول كلمة حق في حق الزميل اللي سبق ونجح بشخصية وبمصطلحاتها اللي علمت مع الجمهور بفضل ربنا، وإحنا اللي بينا كل خير وصحاب وأخواتي وعلى راسي وربنا يعلم أنهم غاليين عندي بس حسيت أني مش شرط يكون زعلي من تجاهلهم يفرق معاهم، فـ محبتش أسيب الموضوع يكبر وتاخد اتجاه مش لطيف، وطلبت من الشباب المسؤولين عن الصفحة تحذف البوست لأن العتاب والهزار هيقلب جد لحد ما أكتب بوست أوضح فيه وربنا ما يجيب زعل ولا مشاكل، وعلى رأي البساطي الفنان أناني ومش عيب”.
مسلسل “عمر أفندى” بطولة أحمد حاتم، رانيا يوسف، آية سماحة، محمد رضوان، محمود حافظ، ومن تأليف مصطفى حمدي، وإخراج عبد الرحمن أبو غزالة، والمكون من 10 حلقات، و عرض عبر منصة شاهد
“أهو ده اللي صار” عرض عام 2019، من تأليف عبد الرحيم كمال، وإخراج المخرج الراحل حاتم علي، وبطولة كل من روبي، ومحمد فراج، وأحمد داوود، أروى جودة، سوسن بدر، علي الطيب، هشام إسماعيل، ومحمود البزاوي، وهبة عبدالغني، إلهام عبد البديع، عماد إسماعيل، وعدد كبير من النجوم.
اقرأ أيضًا:
عمرو مصطفى يجدد دعوته لتقديم “مشربتش من نيلها” بصوت جديد بدلا من شيرين عبد الوهاب
https://www.masrawy.com/arts/zoom/details/2024/9/12/2641660/
بالفيديو.. محمد سامي يكشف سر فقدان وزنه
https://www.masrawy.com/arts/zoom/details/2024/9/12/2641632/