11:01 م
الخميس 10 أغسطس 2023
كتب- مروان الطيب:
حل المخرج محمد جمال العدل ضيفاً على البرنامج الإذاعي “الراديو بيضحك” على راديو “9090”.
وتطرق “ماندو” لأحدث أعماله السينمائية هذا العام وهو فيلم “ع الزيرو” بطولة النجم محمد رمضان والذي عرض مؤخراً بموسم أفلام الصيف ويلقى نجاحاً ملحوظاً بشباك التذاكر، كما تحدث “العدل” عن مسلسله الجديد “الراكون” بطولة الفنان يوسف الشريف في أول تعاون لهما معاً في الدراما التليفزيونية والمقرر عرضه بموسم رمضان 2024.
وبسؤاله عن حقيقة وجود خلاف بين نيللي كريم والعدل جروب بسبب فيلم “ع الزيرو” قال: “أنا معنديش أي معلومة عن أي حاجة من الحاجات دي، كل اللي اعرفه نيللي كريم صورت الفيلم وهي عاجبها وحباه وكانت مبسوطة جداً بالدور وخلصت أخر يوم تصوير وهي بتشكرنا على الفيلم، والمعلومة اللي عندي بحكم قرب علاقتي بنيللي أنها مسافرة لأنها مخدتش إجازة بقالها فترة طويلة جداً، عملت مسلسل في رمضان وكانت شغالة على مسلسلات قصيرة كمان بعدها ولحمت أعمال كتير في بعض، وكملت معانا الفيلم بعد رمضان إنما أنا مسمعتش خالص عن أي حاجة فيها انها زعلانة أو متفقة مثلاً شكلها في الأفيش بشكل معين ومحصلش”.
واستكمل “وبعدين نيللي كريم والعدل جروب قصة عمل سنين طويلة يعني لو في اتفاق على أي حاجة أكيد هيتعمل وأنا مش عارف فين الخلاف بسمع لكن ماشوفتش حاجة من دي خالص على حد علمي يعني”.
وعن اختيارهم لنيللي كريم لتشارك الفنان محمد رمضان البطولة لأول مرة قال: “نيللي كريم ممثلة كبيرة جداً أي حد يتمنى يشتغل معاها أي فيلم تنضم له نيللي كريم تبقى إضافة كبيرة، كمان هي عندها جمهور كبير ففكرة الجمع بين رمضان ونيللي كانت فكرتي من باب أني دايماً بشتغل معاها وأنها تضيف حاجة كبيرة لأفيش وفيلم لمحمد رمضان، وهي كانت مرحبة وعلاقتهم كانت كويسة جداً في التصوير على المستوى الشخصي يعني أول مرة يتعاونوا مع بعض وأنا في رأيي نيللي فرقت مع الفيلم وفنياً هي قدمت حاجة والجمهور مبسوط انها موجودة وشايف انها مكسب مش حاجة ضد الفيلم خالص”.
“ع الزيرو” يشارك في بطولته شريف دسوقي، إسلام إبراهيم، جومانا مراد، الطفل منذر مهران.