علاقات و مجتمع
تميزت الفنانة داليا شوقي بملامحها الهادئة منذ الظهور الأول لها، إذ اشتهرت بأدوارها الفنية المختلفة، فضلًا عن تمتعها بالجمال الملحوظ وأدائها المختلف، وهو ما كان عامل جذب لها، إذ أحبها قطاع كبير من الجمهور على مواقع التواصل الاجتماعي، وهو ما كان سببًا لظهورها خلال لقائها مع إيمان عز الدين ومها الصغير ببرنامج «الستات مايعرفوش يكدبوا»، المُذاع عبر شاشة قناة «سي بي سي».
دخولها المسرح والفن
أحبت الفنانة داليا شوقي المسرح واعتبرته بيتها ودراستها وتربت فيه، وفق حديثها ببرنامج «الستات مايعرفوش يكدبوا»: «أول مرة أقف على المسرح كنت في الحضانة، ولسه بشوف أني في أول مشواري ونفسي أعمل حاجات كتيرة ومختلفة، وربنا مبارك لي من أول يوم واشتغلت مع الأيقونة شريهان، وحسيت أنى مع عيلتي، وحلمي تحقق بالعمل مع شريهان، وده كان حلم بعيد أوي مصدقتش أنه أتحقق، وأول ما شوفتها اتفاجئت ودموعي نزلت، وهي جات لي وأنا واقفة متجمدة وحضنتني واحتويتني جدًا، والحمد لله رب العالمين علاقتنا كويسة لحد دلوقتي، وفي ناس كتير ساعدتني حقيقي أنا ممتنة دائمًا وأبدًا».
حب التمثيل
أتقنت التمثيل وكان العامل الأول في حبها له مساعدة الفنان هادي الباجوري، الذي صفته بـ«وش السعد عليها» : «دايمًا بيغير في جلدى وهو شاف فيا ممثلة كويسة ومشخصاتية فعلًا، أنا وأختي كل واحدة ليها طريقها، وبحاول أحقق أحلامي وأنا دارسة مسرح وحضرت ورش كثيرة، والسوشيبال ميديا هي وسيلة التواصل مع العالم الخارجي وبيبقى في حاجات كتيرة متسلطة، ومينفعش نسمع ليها أنا بسمع الصناع من فنانين ومخرجين والناس القريبة مني، وأحمد فهمى فنان كبير وشامل».
فتى أحلام داليا شوقي
كشفت عن الصفة الأهم في فتى أحلامها، وأنها ليست مخطوبة: «قلبي مش بيتفتح كتير، والشخص اللي معاه مفتاحه لازم يكون حنين، مش مهم الشكل المهم يكون بيعشقني وأنا أكيد هبقى بحبه، شريك حياتي أكيد هيبقى متفهم شغلي وعارفني زي ما أنا، ومستحيل يطلب مني أبعد عن التمثيل، وردًا على سؤال ما الصفة التي لن تقبلها في شريك حياتها، لازم يكون كذاب وظالم».
موقف مؤثر في حياتها
«محمود اللوزي كان أول أستاذ مسرح ليا في الجامعة، وكان فعلا مدرسنا وصديقنا، يوم وفاته عمري ما هنساه في حياتي وحقيقي هزتني وكسرتني، البني آدم ده كنت متأكدة إن عمره ما هيمشي من الدنيا، والرجل فعلًا يتقال عنه أنه ربى أجيال، أنا حساسة جدًا وهو ساعدني في فني فكان لازم أبكي عليه دايمًا»، بحسب داليا شوقي.
الفنان محمود اللوزي هو مخرج مسرحي ووالد الفنانة يسرا اللوزي، وتوفي في نوفمبر من عام 2021، عن عمر ناهز 63 عامًا، وولد في 9 سبتمبر عام 1958، وعمل في مجال التمثيل لفترة، ثم سافر إلى أمريكا، وإلى جوار التمثيل عمل بمجال الإخراج المسرحي، ودرس الإخراج في الجامعة الأمريكية بالقاهرة، ومن أهم أفلامه ميكروفون والكنز وإذاعة حب، والكثير من مسلسلات الدراما.
