تدوين أداء العبادات فى جداول ورقية لم يعد فكرة عملية سهلة المراس على هذا الجيل، فأوجد لهم مهندس برمجيات البديل عبر تطبيق على الهواتف المحمولة يسهل التعامل معه لتدوين العبادات والتذكير بها أيضاً فى حال السهو عنها.
مهندس يدشن تطبيقا للتذكير بالعبادات
يحكى مهندس البرمجة حسن صلاح بغدودة، ابن محافظة كفر الشيخ، أنه عكف 3 أشهر على تدشين هذا التطبيق: «الفكرة كانت لبنت اسمها منار عادل إنّه يبقى فيه تطبيق لتدوين الصلاوات بدل ما فيه ناس بتدون على ورق، وناس بتنسى صلوات ومش بتعوضها، وكلمتنى كمهندس برمجيات عن الفكرة بتاعتها فشجّعتها، وماقتصرتش على الصلاة، ولكن عملنا برنامج دينى متكامل، وكمان زودنا فيه أهداف نكتسب منها عادات دينية ودنياوية».
أضاف مهندس البرمجيات خاصية «أهداف اليوم»، مثل أن يكون التذكير بالصدقات جزءاً منها، ويجمع تطبيق «ارجع صلى» كل العبادات، من فروض وسُنن ونوافل، وفقاً لـ«بغدودة»: «وبما أن الصلاة هى عماد الدين، وأهم العبادات، فالتطبيق بيوفر ميزة إنك تحسب صلواتك اليومية والصلاة اللى فاتتك، حتى لو من سنين علشان تقدر تعوضها، وكذلك الصيام بمعنى إنك تقريباً بتحاسب نفسك وبتشجعها وموجود فيه المصحف مكتوب وسماعى، يعنى إنك ممكن تسمع القرآن بصوت أى قارئ، وتردد وراه، وده هيفيد أكتر فى الالتزام بالورد اليومى، ويفيد الناس إنها تقرأ بطريقة صح».
مميزات تطبيق العبادات
مميزات كثيرة يشملها التطبيق، يُعدّدها «بغدودة»: «الأذان، والصلاة وحسابها بالنوافل، وحساب أيام الصيام، سواء نوافل أو كفارة، والسبحة، والقرآن الكريم، والأذكار والتطبيق مناسب لفئات كتير، وفيه نسبة تشجيع كويسة، ده بالنسبة لنا إحنا، وطبعاً موجود مساحة للأشخاص اللى هيستخدموه إنهم يقولوا أكتر عن المميزات علشان نركز عليها فى التحديثات الجاية، وكذلك العيوب علشان نقدر نتلافاها».