هل المساعد الإلكتروني يعرضك للاختراق؟.. خبير تكنولوجي يرد

​

ربما يساعدك المساعد الإلكتروني في تحقيق المزيد من الأعمال، إذ يساهم في توفير الوقت وتقليل الجهد، كما أنه يمكنه القيام ببعض مهامك اليومية والتفكير المبتكر، ما يحقق الكفاءة وزيادة الإنتاجية، لكن هل المساعد الإلكتروني يعرضك للاختراق؟

هل المساعد الإلكتروني يعرضك للاختراق؟ 

الدكتور مهندس محمد مغربي، استشاري التأمين والذكاء الاصطناعي والخبير التكنولوجي، قال لـ«الوطن»، إن المساعد الإلكتروني ربما يساعدك في الكثير من المهام اليومية، لكنه أيضًا يشكل خطرًا كبيرًا وتهديدًا لخصوصيتك: «لما تيجي تتعامل مع أي مساعد إلكتروني، لازم تفكر الأول في الأمان، كل الأوامر اللي بتقولها أو المعلومات اللي بتسجلها ممكن تكون بتتخزن على سيرفرات مش بتاعتك وبالتالي يعرضك للاختراق».

المساعد الإلكتروني يقوم بطلب أذونات وأوامر يتم تسجيلها على سيرفرات وأنظمة ربما تعرضك للاختراق بحسب الخبير التكنولوجي: «بيسجل كل حاجة، يعني لو قلت “إليسا افتحي الأنوار”، ده مش مجرد أمر بسيط، ده ممكن يكون فيه تسجيل صوتي بيتخزن وممكن كمان حد يستخدمه في المستقبل، عشان كده لازم نكون واعيين ونحدد إيه المعلومات اللي بنديها للتكنولوجيا».

مخاطر المساعد الإلكتروني

وبحسب الخبير التكنولوجي، فإن المساعد الإلكتروني أحيانًا يكون غير دقيق في استخدام الأوامر: «لازم تكون عارف إن التكنولوجيا دي مش دايمًا دقيقة، ساعات المساعدين الإلكترونيين ممكن يفهموا الأوامر غلط، وده ممكن يؤدي لمواقف غريبة أو حتى خطيرة، زي ما حصل مع ناس اشتكوا إن أليكسا كانت بتشغل موسيقى لوحدها أو بترد على أسئلة ماحدش سألها».

السيطرة على الإنسان

تساؤلات كثيرة يطرحها العديد من الأشخاص حول هل يمكن للمساعد الإلكتروني أن يسيطر على الإنسان؟ وهو ما أجاب عليه «مغربي»، قائلاً: «فيه ناس بتقول إن التكنولوجيا دي ممكن تتحول لحاجة تسيطر علينا، يعني، لو كل حاجة في حياتنا بقت معتمدة على المساعد الإلكتروني، إيه اللي هيحصل لو التكنولوجيا دي باظت؟ أو لو حد اخترقها؟ الخطر الحقيقي هنا مش بس في الأعطال، لكن كمان في فكرة إن التكنولوجيا دي ممكن تقرر عننا وده خطر جدًا».

تحذيرات كثيرة من استخدام تقنيات الذكاء الاصطناعي بشكل مفرط بحسب الخبير التكنولوجي: «ممكن يتطور لدرجة يخلي المساعدين الإلكترونيين ياخدوا قرارات بدلنا، مثلاً، بدل ما أنت تختار أغانيك، المساعد يقرر هو إيه اللي يناسب حالتك النفسية، بدل ما تقرر إيه اللي تشتريه، هو يقولك ده هيعجبك أكتر، رغم أن التكنولوجيا ليست شريرة، لكن لازم نكون حذرين في استخدامها، لازم يكون في ضوابط ونفكر كويس قبل ما نعتمد عليها في كل حاجة. التكنولوجيا نعمة، بس لو استخدمناها غلط، ممكن تتحول لكارثة».