حسام المندوه عن سحب أرض أكتوبر من الزمالك: هناك تربص واضح

تحدث حسام المندوه، أمين صندوق نادي الزمالك، عن سحب أرض أكتوبر من النادي من جانب وزارة الإسكان خلال الساعات القليلة الماضية بصورة رسمية.

حسام المندوه يعلق على سحب أرض أكتوبر من الزمالك 

وقال حسام المندوه في تصريحات تلفزيوينة: إحنا اتفاجئنا بقرار وزارة الإسكان بسحب أرض 6 أكتوبر من غير أي إخطار رسمي، بناشد رئيس الجمهورية، خصوصًا إن الاتجاه العام دلوقتي كله تشجيع الاستثمار، بدأنا بالفعل نشتغل في فرع أكتوبر، عملنا تعاقدات مع مستثمرين، ودفعنا فلوس للمقاول.

وتابع: كلنا قولنا إن حلم الزملكاوية اللي طول عمرهم مستنيينه أخيرًا بدأ يتحقق وفي نفس الوقت بدأنا نحرك عجلة الاستثمار ونبني الفرع ونفتح باب العضويات ، الموضوع واخدينه بجدية كبيرة، ومعانا أوراق بتأكد إن فيه مد للمهلة لحد سبتمبر 2026 وخلال شهر كان المفروض الملاعب تبان والعضويات تتنقل.

وواصل: وجه رسالة واضحة لفخامة الرئيس: الموضوع ده مهم جدًا للزملكاوية، حلم اتأجل سنين، وأخيرًا وقفنا على أرض صلبة وبدأنا نعتمد على نفسنا من غير دعم،جماهير الزمالك في كل العالم مستنية المشروع ده، واللي بيحصل دلوقتي مش في صالح الرياضة المصرية.

واستكمل: إحنا دفعنا مقدم تعديل الاشتراطات البنائية وكمان 40 مليون جنيه ومفيش سبب واضح للسحب، خصوصًا إن معانا مستند رسمي بالمهلة لحد سبتمبر 2026، بأي منطق في أقل من سنة تتسحب الأرض وأنا لسه عندي 4 سنين مهلة للمنشآت الاستثمارية!.

وأردف: بنطالب ونتمنى نقابل الرئيس، وأنا واثق لو عرضنا عليه الموضوع هيخلص فورًا لأنه حريص على الاستثمار، منطقة حدائق أكتوبر الأسعار عليت بسبب إن الزمالك بيبني الفرع هناك، من زمان بنقول إن حل أزمة الزمالك هيكون عن طريق فرع 6 أكتوبر، ولما بدأنا نشتغل اتفاجئنا بالقرار ده الغريب وواثق إن القرار مش منطقي بالمرة.

واختتم: بنسعى لجلسة مع وزير الإسكان، لكن لازم تدخل على مستوى أعلى، لإن اللي بيحصل بيحبط جماهير الزمالك ومش طبيعي أرض تتسحب بعد أقل من سنة، ده في تربص واضح.