تطورات أزمة منشطات رمضان صبحي.. وموعد الحكم النهائي

كشف الإعلامي أحمد شوبير، عن آخر تطورات أزمة منشطات رمضان صبحي، لاعب الفريق الأول لكرة القدم بنادي بيراميدز، بعد خضوعه لأولى جلسات الاستماع أمام المحكمة الرياضية.

كواليس جلسة استماع رمضان صبحي بشأن أزمة المنشطات

وقال «شوبير» عبر برنامجه «مع شوبير»، المُذاع على «أون سبورت إف أم»: «رمضان صبحي خضع لجلسة استماع امبارح أمام المحكمة الرياضية، عن طريق الفيديو كونفرانس، وجرى حجز القضية للحكم النهائي، ومن فضلك لو سمحت مفيش ميعاد اتحدد وأوعى تصدق الكلام ده، وسيبك من كل الناس دي».

وأضاف: «هتطلع الناس تقولك رمضان صبحي لاعب بيراميدز إيقاف 4 سنين، رمضان صبحي براءة، لأ رمضان صبحي 3 شهور، كل الكلام ده هري لأن ببساطة محدش يعرف حاجة، والناس استمعوا لرمضان صبحي وخلاص، ويا رب القصة تنتهي بقى لأن أكيد رمضان صبحي مهموم، وربنا يستر على الجميع».

رسالة من شوبير بشأن رمضان صبحي وأزمة المنشطات

وتابع حارس منتخب مصر الأسبق: «نفسنا الموضوع يخلص بقى، ورمضان صبحي الموهوب يتفرغ للملاعب، ودماغه تبقى فاضية ورايقة، والدنيا تهدى بقى بخصوص القضية دي، وهنشوف إيه اللي هيحصل الفترة الجاية، وموعد الحكم النهائي في القضية، لكن مفيش أي قرار صدر بشأن اللاعب حتى هذه اللحظة».