عاجل| لأول مرة.. زيزو يعلن أزمة تجديده للزمالك ويكشف مفاجآت بالجملة

كشف هاني حتحوت، تطورات جديدة بشأن مصير أحمد مصطفى زيزو لاعب الزمالك ومنتخب مصر، في ظل حالة الجدل المُثارة خلال الأيام الأخيرة حول اقتراب اللاعب من الانضمام لصفوف النادي الأهلي، خلال فترة الانتقالات الصيفية المقبلة، لا سيما في ظل انتهاء تعاقده داخل جدران القلعة البيضاء بنهاية الموسم الجاري.

وقال هاني حتحوت في تصريحات إذاعية عبر برنامج «الكلام المظبوط»، المُذاع عبر «أون سبورت إف أم»: «النهاردة فجرًا بعت لزيزو قلتله لو حابب تتكلم، لاقيته اتصل بي واتكلمنا فوق الـ50 دقيقة وشرح لي الموقف كاملا».

وتابع: «زيزو قالي إنه في غاية الإحباط ومش مصدق إن دي المعاملة اللي يستحقها من مسؤولي وجماهير الزمالك، وأبويا راجل محترم وهو اللي جدد عقدي مع الزمالك مرتين ومخدش فلوس، والمشكلة الحقيقية السمسرة اللي بتحصل في أي صفقات تانية، ومكانش فيه حاجة بتحصل غير أما بتتسرب بعد الجلسة مباشرة».

وأردف حتحوت: «زيزو قالي مشكلتي ليس الفلوس لإن ببساطة اتغير عليا 7 مجالس إدارات وكنت بجدد عقدي عادي وحتى أما طلع هشام نصر قال إنني عاوز 60 مليون جنيه، والله الكلام ده ما حصل، ولكن بابا قاله هتعرف تعوض إبني بعد عرض نيوم بما إنكم رفضتوا العرض ولكن مكانش فيه رد مقنع».

واصل: «زيزو قالي أيضًا، العمال في النادي كان بيقولوا إن الزمالك خد قرض بـ200 مليون جنيه عشان يجدد للزمالك، وميدو اللي عاوز يجددلي كان بيهاجمني في المدرجات خلال مباراة مودرن سبورت وقال بقى ده اللي عاوز كل الملايين دي.»

وأوضح حتحوت على لسان زيزو: «زيزو قالي بقالي 7 شهور بتحايل عليكم عشان أجدد وكنت بغشش حسين لبيب إزاي يتعامل مع والدي، وقلت لشيكابالا أرجوك اتصرف مع الإدارة وخليهم يتعاملوا ويجددوا لي».

وأشار: «والله العظيم، عرض الزمالك أقل عرض متقدم لي سواء خارج مصر أو بداخل مصر»

ماذا قدم زيزو مع الزمالك الموسم الجاري؟

ولعب «زيزو» هذا الموسم 29 مباراة مع الزمالك، بواقع 15 لقاء في الدوري المصري، و8 بكأس الكونفدرالية الأفريقية، و2 في كأس السوبر المحلي، و3 بكأس مصر، ومباراة في السوبر الأفريقي.

وسجل «زيزو» 7 أهداف، من بينها 3 في الدوري المحلي، و3 ببطولة الكونفدرالية، وهدف وحيد في كأس مصر، وصنع 8 لزملائه.