سحرها الطبيعى يأخذك إلى عالم آخر، إذ تتميز محافظة أسوان بمعالمها السياحية الجاذبة التى جعلتها تلقب بـ«أيقونة السحر والجمال ولؤلؤة النيل»، التى تجذب السياح فى كل فصول العام وخاصة فى الشتاء، بدءاً من طيبة أهلها مروراً بعاداتهم وثقافاتهم المختلفة، انتهاء بالآثار التى تكشف أسرار الحضارة المصرية، بحسب المصور المصرى والرحالة محمود شلبى، الذى وثَّق عديداً من الأماكن الرائعة فى مصر، من بينها أسوان.
جمال أسوان يجذب رحالة مصري
«معبد فيلة فى أسوان من أكتر المعابد اللى أبهرتنى بجمالها، محتفظ بالنقوش الموجودة على جدران المعبد، وهناك هتستمتع بجولة وعروض الصوت والضوء بالليل، والحكايات اللى كانت فيه على مر العصور»، هكذا وصف الرحالة المصرى جمال المعبد الذى يجذب السياح من كل مكان فى العالم، داعياً السياح لزيارة البلد.
«تعالوا زورونا هتنبهروا بحضارتنا»، شعار يرفعه «شلبى» الشهير بـ«شلبوكا» كنوع من أنواع الترويج للسياحة فى يومها العالمى: «أسوان من أحلى الأماكن اللى روحتها فى مصر واللى بحب أروحها كل سنة ومش بزهق منها أبداً مهما قعدت فيها، وأجمل تجربة ممكن تعيشها هناك هى إنك تروح النوبة، وتقعد فى بيت نوبى وتجرب الأكل بتاعهم، وتشوف قد إيه هما طيبين وتشوف عاداتهم وتقاليدهم المختلفه عننا، هتحس فيها إنه قد إيه مصر فيها حاجات حلوة ممكن تستمتع بيها من غير ما تسافر بره».
المعالم السياحية في أسوان
جمال النيل جذب «شلبى» نحو زيارة أسوان بشكل متكرر، فضلاً عن إصراره على معرفة أسرار الحضارة المصرية القديمة فى أيوان الأثرية: «كفاية إنك تصحى الصبح تشوف منظر النيل، وتاخد مركب وتلف بيه، وتبقى شايف البيوت الملونة حواليك فى كل مكان، كمان هتقدر تشوف معابد كتير وأنت فى أسوان».
يهدف «شلبى» إلى الترويج للسياحة المصرية وتعريف السياح والناس بأهمية الأماكن الأثرية والسياحية، لذا يُسخر كل إمكانياته لزيارة المحافظات السياحية والأثرية: «بلف مصر كلها علشان أبرز جمالها، وبنشر الصور والفيديوهات على صفحاتى بمواقع التواصل الاجتماعى عشان توصل لأكبر عدد من الأجانب».