11:24 م
الخميس 22 أغسطس 2024
كتب – معتز عباس:
كشفت التيك توكر شهد أحمد، تفاصيل ما حدث معها ومع أحد المخرجين طلب منها خلع الحجاب من أجل المشاركة في عمل بطولة إحدى النجمات.
ونشرت “شهد” فيديو عبر حسابها الرسمي على موقع “تيك توك”، تحدثت فيه عن التفاصيل، قائلة: “الكلام اللي أنا هقوله ده لا طالعة أخد بي ريتش ولا تريند ولا حتى كدب.. الكلام ده حقيقة بس مش هينفع أذكر أسماء عشان مفيش حد ييجي يلومني والله العظيم الكلام ده كله ما فيه كلمة واحدة كدب”.
وتابعت: “أنا كنت ماضية عقد مسلسل وكنت هطلع فيه دور أخت البطلة مع فنانة معروفة جدا بس أنا مش هقول اسمها، أنا دلوقتي في إسكندرية وكنت رايحة أمضي العقد في القاهرة يعني أنا سافرت المسافة دي كلها عشان أمضي العقد لأن أنا اتقالي هبقى أخت البطلة والمخرج نفسه قالي هبقى أخت البطلة”.
وأكملت: “بقالي شهر ونص العقد معايا على أساس إن أنا على آخر الشهر ده حسب ما المخرج قالي إن المعدة هتيجي تكلمني بتاعت الملابس وهتقولي هتجيبي لبس إيه والكلام ده، وإن أنا خلاص هروح أصور”.
وأردفت: “جاتلي رسالة من المخرج نفسه مكتوب فيها معلش إحنا غيرنا الدور، والدور ده مش هتبقى فيه أخت البطلة هتبقى دور واحدة اسمها كذا كذا وهيبقى الدور مثلا بتاع 6 مشاهد، قولتله طيب معنديش مشاكل بس فيه حاجة بقى وقفتني بيقولي الدور ده اتغير عشان أخت البطلة متحررة قولتله متحررة يعني إيه؟”.
وتابعت: “قالي مينفعش يبقى بحجاب!، قلت له يعني إيه ما ينفعش بحجاب، يعني أنت دلوقتي بتقيدني؟ قالي لأ مينفعش بحجاب وهو دور متحرر ولو أنتي عايزاه يا ستي بس هو بدون حجاب، والسيناريو مكتوب إن هو مينفعش بحجاب”.
وواصلت: “أنا طبعا سمعت الكلمتين دول من هنا واستغربت، طب أنت قايل لي وعارف إن أنا جاية محجبة وعارف إن أنا عمري ما هقلع الحجاب وعلى مشهد زي ده أنا قلت له وبلغته قبلها لما سألني في أول مقابلة خالص، فأنت تيجي بعد شهر ونص وخلاص محضرة كل حاجة وخلاص، تيجي تقولي المشهد ده مش هينفع عشان انتي محجبة والدور ده متحرر!”.
وأضافت: “مضيت العقد عليه ودور كامل في مسلسل كامل ودور حلو اتلغى فيه مرة واحدة عشان بس أنا محجبة!، دلوقتي الحجاب ده بقى سمعة سيئة!، مينفعش أمثل بيه!، وأنا جاية مش دور كومبارس أنا جاية دور كبير فعشان أنا محجبة هاخد دور كومبارس مرة واحدة!”.
وأختتمت: “المشكلة إن ده ما اتبلغتش بيه في ساعتها مثلا لأ ده بعد شهر ونص وبعد ما مضيت العقد اتقال لي أنتي دورك اتغير عشان أنتي محجبة والدور ده مش هينفعلك وانتي محجبة!، طبعا أنا بصراحة كرامتي متسمحليش، يعني إيه عشان محجبة!، فأنا لغيت المسلسل كله وأنا بصراحة راضية عن القرار ده وأنا شارية حجابي ومش شارية المسلسل نهائي، وبقول للمخرج شكرا ودور على واحدة متحررة وبتطير وأنا شارية حجابي وبس كده، شكرا”.
@shahd_ahmed53_ الفيديو مهم جدا ياريت كله يشيره‼️😢#شهد_معكم_لحياة_افضل ♬ الصوت الأصلي – ✨شهد معكم لحياه افضل ✨
اقرأ أيضا..
هاني سلامة وأحمد عبدالعزيز.. نجوم الفن في عزاء “حما” الفنان إيهاب فهمي
أيمن زيدان يكشف تفاصيل دوره في مسلسل “العميل” قبل عرضه