02:25 ص
الثلاثاء 13 أغسطس 2024
كتب- مروان الطيب:
حلت الفنانة المعتزلة هدى رمزي على برنامج “تفاصيل” تقديم الإعلامية نهال طايل المعروض على قناة “صدى البلد 2″، من خلال مداخلة هاتفية.
وتحدثت هدى عن قرار اعتزالها الفن، وعن علاقتها بنجوم ونجمات الوسط الفني، وذكرياتها مع أهم النجوم وصناع السينما المصرية، إلى جانب رأيها في عدة مواضيع فنية منها تكرار أزمات الفنانة شيرين عبد الوهاب، إلى جانب كواليس وأسرار تخص حياتها الشخصية كشفت عنها لأول مرة.
وعن السبب وراء حبها للفن قالت: “أنا عشقت الفن بسبب حب الناس للفنان، والجمهور قمة الطاقة الإيجابية وممكن تبقي تعبانة، زهقانة ومتضايقة وتلاقي مجاملة من حد بطريقة محترمة بيبقى ده علاج، والجمهور ده بلسم للفنان لأن لما بيحس بقيمته وبيحبه ويديله الإحساس ده، بيبقى ده رأس مال الفنان الحقيقي مش الفلوس”.
وبسؤالها: “لو اتعرض عليكي ورق حلو ودور حلو نقدر نقول ان حضرتك ممكن تخوضي التجربة من تاني وتستردي طاقتك من تاني؟”، ردت هدى: “كنت بفكر إني أعمل كده بس الحقيقة دلوقتي مبقاش فيه التقدير للفنانين بتوع زمان، والتقدير ده من الجمهور مش من الوسط مش الميديا نفسها، وللأسف التعامل مع الفنانين خصوصًا الجيل بتاعنا مش بنفس احترام وقتنا مش بنفس التقدير، وبسمع زملائي اللي بيشتغلوا 20 و22 ساعة وبيدخلوا مستشفيات بسبب الضغط النفسي، أبدًا الفنان عمره ما يتهان كده ولو متقدرش كفاية بيبقى الحقيقة شيء سيء”.
واستكملت: “الوسط اتغير خالص، وأنا علاقتي بكل زمايلي الفنانين بتوع جيلي مازالت قوية قوي، وعلى تواصل دايمًا مع سهير رمزي وبوسي ونورا وأخيرًا سلوى خطاب بقت من الناس المقربين جدًا لقلبي وبستمتع اننا نقعد مع بعض وبقت علاقتي قوية بيها أوي، وكتير إلهام شاهين وليلى علوي ومازالت علاقتي بالناس دول كلهم علاقة قوية جدًا وانا بحبهم قوي، ودايمًا الحب بيبقى ليه مردود حب”.
وأضافت: “بس الحقيقة بقت الشكوى جامدة جدًا من الوضع اللي حاصل في الوسط الفني وكلنا بنشتكي بصراحة وحتى وأنا بعيدة أنا بشتكي وبقول ليه وصلنا كده؟، وبتمنى الحاجات دي كلها تتغير ونرجع تاني، وبنحاول نعمل كده”.
يذكر أن أخر مشاركات هدى رمزي الفنية قبل الاعتزال كانت من خلال فيلم “الصديقان” عام 1993.
اقرأ أيضا:
قبل عرضه.. فريق مسلسل “سراب” يكشفون تفاصيله لـ”مصراوي”