عاجل| يوسف حسن يهاجم الزمالك: مستقبلي بيضيع

هاجم يوسف حسن لاعب نادي الزمالك، إدارة القلعة البيضاء بدعوى عدم الوقوف معه في إصابته التي أبعدته عن المباريات في الفترة الأخيرة.

يوسف حسن: مستقبلي بيضيع

كتب يوسف حسن عبر حسابه على فيسبوك: «أنا بسبب اللي بيحصل معايا ده هبطل كورة، أنا مبدربش ومستقبلي بيضيع، الكورة هي شغلي وأكل عيشي ومش عارف أنا أذنبت في إيه ولا عملت ايه علشان اللي بيحصل معايا، اللي حصل فيا مش قليل، عارف الناس ممكن متصدقش اللي بيحصل معايا، بس وحياة الأيام المفترجة دي بعد إصابتي محدش كان عايز يعملي العملية من الإدارة وبعد أكتر من 6 شهور قاعد في البيت عملت العملية بعد مجهود كبير جدا جدا».

يوسف حسن لاعب نادي الزمالك 

فلوس العلاج الطبيعي في الزمالك

أضاف يوسف حسن: «بعد العملية الإدارة الجديدة وعدتني هنوديك علاج طبيعي وأول شهر ودوني لدكتور علاج طبيعي اسمه خالد الشناوي، رحت شهر واتنين والنادي مدفعش الفلوس للدكتور، وكل شوية يقولي ويطلب فلوسه طبعا أنا اتكسفت إني أروح تاني العلاج الطبيعي وبقالي 3 شهور قاعد ف البيت».

تابع لاعب الزمالك: «وحياة ربنا وحياة ربنا ما حد عبرني بمكالمة تليفون ولا حد بيرد عليا أصلا، حسبنا الله ونعم الوكيل في كل ظالم، أول مرة أشوف كده اول مره أشوف ظلم بعيني فعلا، عمري ما حصلي كده في حياتي».