خالد سليم عن تامر حسني: “احنا مش صحاب و ليه أفرض لقب على جيل كامل؟”

01:09 م


الجمعة 30 يونيو 2023

كتب- مصراوي:

تحدث الفنان خالد سليم عن علاقته بالفنان تامر حسني وعن حقيقة خلافاتهما وكشف عن رأيه في لقب “نجم الجيل”.

وقال خلال لقائه ببرنامج حبر سري مع المذيعة أسما إبراهيم المعروض عبر شاشة القاهرة والناس: “أنا عمري ما تنمرت على أي حد لا في السر ولا في العلن وعمري ما انتقدت عمر وسلمى بالعكس ده كان نجاح حلو وشغل حلو معمول”.

وأضاف: “احنا أصلا علاقتنا ببعض من بعيد لبعيد تماما احنا مش صحاب.. هو كان بيبتدي لسه وأنا كنت عامل أغنية عالم تاني وأغاني فيلم السلم والثعبان فكانت علاقتنا لطيفة عشان كنا نفس الجيل، وفي الفترة دي كنا احنا واقفين وماسكين إيد بعض أنا وهو وشيرين وشيماء سعيد وحماقي وكنا كلنا مع بعض ساعتها”.

واستكمل: “مع الوقت بقى حصل حاجات كتير بس مش بينا كلنا أنا علاقتي بشيرين كويسة جدا بقالنا فترة متكلمناش بشكل مباشر وحماقي يجنن ورامي صبري على تواصل مع بعض إنما هو عمل لنفسه حتة لوحده وعايز يبقى لوحده”.

وأضاف عن لقب “نجم الجيل” : “هو ما شاء الله بذكائه ونجاحاته اللي عملها هو يستحق إنه يكون في مكانة كويسة جدا بس ليه أفرض لقب على جيل كامل؟ ده مش منطقي أنا مع الألقاب اللي الجمهور بيطلقها على النجم أو النقاد اللي هي بريئة مش مفتعلة مش اللي النجم واللي حواليه بيطلعوها عليها والتطبيل بقى .. أنا شايف إن هو بعد نفسه إنسانيا من حوالينا كلنا يمكن كان عايز يركز أكتر ومش عايز حد يشوش عليه مع إني بسمع إنه بيقابل ناس وبيعمل خروجات”.

وحرص الفنان خالد سليم، على تهنئة الجمهور بعيد الأضحى المبارك 2023.

ونشر سليم، صورا له، عبر حسابه الشخصي على إنستجرام، وعلق: “كل عام وأنتم بخير بمناسبة حلول عيد الأضحى المبارك.. أعاده الله علينا وعليكم بكل الخير والسعادة والصحة”.